BUTUAN CITY – Aduna pa’y duha pa ka torneo nga apilan karong buwana sa Pinoy pole vaulter EJ Obiena human niya makuha ang bronze medal sa INIT Indoor Meeting Karlsruhe sa Germany kagahapon sa buntag.
Ang maong kalampusan mi-abot pila ra ka adlaw human niya nasakmit ang gold medal sa Asian Indoor nga gipahigayon sa China.
Sumala ni Obiena, hapit na unta dili matuman ang iyang pag-apil sa Germany tungod sa problema sa scheduling ug pagbiyahe.
Apan pinaagi sa tabang sa Embahada sa Pilipinas, nasulbad ang pipila ka isyu mao nga nakapadayon siya sa kompetisyon sa Germany.
Sa pagkakaron, mag-regroup una siya uban sa iyang coach aron susihon ang kahimtang sa iyang lawas tungod sa grabe nga biyahe alang sa duha ka torneo.
Wala pa gihapon siya kasiguro kung makasalmot ba siya sa torneo sa France karong Pebrero 19 ug sa Poland karong Pebrero 22.
