BUTUAN CITY – Gikumpirma ni Senate President Pro Tempore Panfilo “Ping” Lacson nga apil si kanhi House Speaker Martin Romualdez sa mga girekomendang kasuhan sa draft report sa Senate Blue Ribbon Committee may kalabotan sa gika-ingong anomalya sa pondo alang sa flood control projects.
Gipasabot ni Lacson nga si Romualdez sakop sa ikaduhang kategorya sa mga personalidad nga gitumbok sa pagdungog – nga mga indibidwal nga ang pangalan misangko sa testimonya sa mga testigo apan wala’y direktang ebidensya nga nagpakita nga sila nakadawat og kwarta.
Gipadayag niini nga bisan pa nga gi-akusahan sa surprise witness nga si Orly Guteza nga nakahatud siya og kwarta ngadto nila Zaldy Co ug Romualdez, apan wala man gayo’y gipakita nga ebidensya nga nakadawat og kickback ang kanhi House Speaker.
Gawas niini, nahisgutan usab sa Senado ang mga alegasyon nga naglambgit kang Romualdez sa mga contractors nga sila Sarah ug Curlee Discaya, nga gika-ingong gigamit matud pang front sa pagpalit og high-end nga kabtangan sa Makati City apan sigon ni Lacson, wala gihapo’y nasubmite nga direktang ebidensya sa pagdungog nga makapamatood sa maong mga pasangil batok kang Romualdez.
Dugangni Lacson, magpahigayon og miting ang mga senador gikan sa majority bloc aron hisgutan ang mga isyu nga may kalabotan sa draft report sa Blue Ribbon Committee, ilabina ang kakulang sa pirma o partisipasyon sa bisan usa ka miyembro sa minority bloc.
Matod pa niya, importante nga adunay representante gikan sa minority, labina ang minority leader, aron mapadayon ang kredibilidad ug integridad sa report sa dili pa kini hingpit nga palig-unon sa Senado.
