BUTUAN CITY- Nakahimo og usa ka makasaysayang facial transplant Ang Vall d’Hebron Hospital sa Barcelona diin sa unang higayon sa kalibutan, ang donor maghatag sa iyang nawong sa dili pa himuon ang assisted dying procedure.
Ang komplikadong operasyon nga nagkinahanglan og composite tissue gikan sa tunga-tungang bahin sa nawong gipangulohan sa kapin 100 ka medical experts, lakip na ang mga psychiatrist ug immunologist. Ang recipient nga nailang si Carme adunay facial tissue necrosis tungod sa pinaakan sa insekto nga mingresulta og bacterial infection.
Ang Spain nailhan nga lider sa organ transplants ug kaniadtong 2021 nahimong ika-upat nga nasud sa European Union nga nag-legal sa euthanasia, ug ang Vall d’Hebron nakahimo na og tunga sa unom ka facial transplants sa nasud, lakip na ang unang full face transplant sa kalibutan niadtong 2010.
Sumala sa datos sa gobyerno, adunay kapin 6,300 organ transplants nga nahimo sa Spain niadtong miaging tuig, diin ang kidney ang pinakakomun, samtang 426 ka tawo ang nakadawat og assistance in dying niadtong 2024.
