BUTUAN CITY-Isip kabahin sa pagsaulog sa umaabot nga Leprosy Control Week sa katapusan sa Pebrero, gipasabot ni Dr. Niña Medina-Gonzalez, usa ka dermatologist, nga ang sanla o leprosy usa ka bacterial infection sa lawas.
Kasagaran kini makita pinaagi sa mga sintomas sama sa puti-puti o pula-pula nga patches nga motumaw bisan asa nga parte sa lawas, ilabi na sa mga nag-edad og 30-anyos pataas kansa kasagaran hinay na ang immune system.
Kini sukwahi sa dupang, diin ang sanla dili basta mawala ug mahimo pa nga makadeform sa parte sa lawas nga maka-apekto kung dili dayon matambalan.
Sigon ni Dr. Gonzalez, dili angay kahadlokan ang sanla ug dili kini usa ka death sentence. Bisan pa kini makatakod kung hinay ang resistensya—pinaagi sa pag-ubo, sip-on, o close contact exposure sa pasyente—dili kinahanglan ilahi ang pagkaon sa pasyente ug dili usab kini makatakod pinaagi sa sexual contact.
Kung ma-expose sa taong adunay sanla, angay nga pakusgon ang resistensya ug magpakonsulta sa doktor. Dugang pa niini, nga mas maayo nga matambalan kini sa sayo diin libre ug epektibo ang treatment niini, aron mapugngan ang pagkaylap sa sakit ug masiguro nga maayo dayon ang pasyente.
