BUTUAN CITY – 6 ka mga tawo usab ang nasakpan ug natikitan tungod sa ilegal nga paglabay og basura sa Barangay Masao ning siyudad sa Butuan. Ang maong operasyon gihimo sa barangay isip kabahin sa kampanya kontra illegal garbage dumping.
Sumala ni Kagawad Ricky Demata, chairman sa Committee on Environment sa Barangay Masao Council, dugay na kining problema ug permi na lang mahitabo ang ilegal nga paglabay og basura sa boundary sa Barangay Ambago ug Barangay Masao.
Matod sa opisyal, sinako-sakong basura nga wala ma-segregate ang ilang makuha sa maong dapit ug kadaghanan niini dili gikan sa Barangay Masao kundili gikan sa ubang mga barangay.
Nailhan ang mga tag-iya sa basura tungod sa mga silopen ug parcel nga adunay pangalan.
Tungod niini, gipahamtangan og multa nga tres mil pesos ang matag usa sa unom ka mga tawo nga nasakpan sa maong ilegal nga buhat.
Padayon ang pagbantay sa barangay aron mapugngan ang ilegal nga paglabay og basura, ug naghinaot ang mga opisyal nga unta sundon sa katawhan ang hustong pagdumala ug paglabay sa basura.
