BUTUAN CITY – Gikumpirma sa Presidential Communications Office kon PCO nga padayon ang pagpa-ayo ni Pangulong Ferdinand Marcos Jr gikan sa sakit nga diverticulitis.
Sigon ni PCO Secretary Dave Gomez, nakabalik na sa Malakanyang ang pangulo gikan sa tibuok gabii nga pag-obserba sa mga doktor kaniya sa St Luke’s Medical Center rason nga wala siya makatambong sa pipila ka kalihukan sa palasyo.
Gipaniguro ni Gomez nga padayon ang pagpa-ayo sa pangulo ug padayon ang pagtutok niya sa mga kalihukan sa gobyerno samtang ang pipila niya ka mga membro sa gabinete apil na si Executive Secretary Ralph Recto ang mahimong muhulip kaniya sa pipila ka mga kalihukan.
Kaganina, gipangunahan ni Recto ang pagrepresenta sa pangulo sa gihimong Saludo 2025 ug gipasabot nga ang tambag sa mga doktor nga maghinay-hinay una siya sa iyang mga trabaho ang hinungdan nga siya ang mitambong sa maong kalihukan.
Usa ka semana lang matud pa ang tambag sa doktor nga mupahulay ang pangulo rason nga balik na unya sa normal ang tanan niining mga kalihukan paglabay sa pipila ka mga adlaw.
