BUTUAN CITY – Posibleng apil sa hisgutan karong semana, sa himuon Association of Southeast Asian Nations kon ASEAN Foreign Ministers’ Retreat sa Lapu-Lapu City, ang mga isyu sa West Philippine Sea ilabina ang padayong pagpang-bully sa mga barko sa China ngadto sa mga barko sa Pilipinas.
Sigon sa tigpamaba sa ASEAN events nga si Dax mperial, ang retreat usa ka closed door meeting nga magtugot sa mas plantad nga mga panaghisgot ilabina sa mga isyung gusto nilang hatagan og pagtagad apil na ang gibangi-ang isyu sa kadagatan tali sa China ug Pilipinas.
Gikumpirma usab niini nga mutambong sa nasangpit nga kalihukan ang mga foreign ministers sa mga nasud nga sakop sa Southeast Asia gawas lang sa Myanmar nga magpadala lang og usa ka senior official partikular ang ilang permanent secretary of foreign affairs.
Samtang wala’y angayang kabalak-an sa seguridad sa mga delegado tungod kay gipasalig sa kapulisan nga secured na ang mga venues apil na ang mga lugar nga apil sa ruta sa mga delegado. Sigon ni Lapu-Lapu City Police Office spokesperson PCaptain Edzel Petecio, taud-taud na nilang giplastar ang paghatag og hugot nga seguridad ngadto sa tanang mga lugar nga abtan sa mga delegado.
