BUTUAN CITY – Giklaro ni House Majority Leader ug Ilocos Norte 1st District ug Presidential son Rep. Sandro Marcos nga dili niya babagan ang bisan unsa mang impeachment complaint, lakip na ang gisang-at batok sa iyang amahan nga si Pangulong Ferdinand Marcos Jr.
Kini human giduso ni Atty Andre de Jesus ang unang impeachment complaint batok sa Chief Executive niadtong Lunes, Enero 21, nga mao pa lang ang opisyal nga gidawat sa House of Representatives.
Nagpasabot si Rep. Marcos nga ang gahum sa pag-refer sa mga kaso ngadto sa plenaryo anaa sa Committee on Rules, nga siya mismo ang chairman.
Obligado matud pa ang Kongreso base sa Konstitusyon nga paminawon ang mga kaso batok sa bisan kinsang impeachable officers ug kinahanglan niyang buhaton ang iyang katungdanan isip majority leader ug dili niya pugngan ang impeachment complaint nga ma-refer sa plenaryo o sa Committee on Justice.
Bisan pa man, gibutyag ni Rep. Marcos nga nagtuo siya nga wala’y sala nga nabuhat ang iyang amahan.
