BUTUAN CITY – Gipresentar sa Police Regional Office kon PRO-13 ngadto kang acting Philippine National Police kon PNP chief PLt Gen Jose Melencio Nartatez Jr, ang 50 ka mga ‘friends rescued’ kon FR- kansa mga kanhi rebeldeng New People’s Army kon NPA nga anaa na sa sabakan sa balaud.
Atol kini sa command visit sa heneral sa may Camp Rafael Rodriguez ning siyudad sa Butuan nga gidungan usab sa gihimong blessing ug turn-over ceremony sa pipila ka mga pasilidad ug gamit sa PRO-13.
Sa maong ihap, 14 kanila ang gikan sa lalawigan sa Agusan del Norte; 10 sa Agusan del Sur, unom sa Surigao del Norte samtang 17 sa Surigao del Sur ug tulo ang gikan sa Special Action Force kon SAF. Apil sa gipresentar kang General Nartatez ang 48 usab ka nagkada-iyang mga armas.
Isip pasi-unang tabang ngadto kanila, gihatagan silang tanan og tag-usa ka sakong bugas samtang ang mga mitahan sa probinsyal nga kagamhanan sa Agusan del Sur, gihatagan usab og tag-10 mil pisos nga cash aron ilang personal nga magamit.
Sigon ni General Nartatez, ang pagtahan sa mga FRs kabahin sa development package program sa gobyerno alang sa mga komunidad ug membro sa komunidad aron mahatagan sila og trabaho gawas nga hatagan sila og initial capital alang sa ilang paninabuhian ingon man ilang kapuy-an.
