BUTUAN CITY – Mismong si Butuan City Mayor Lawrence Lemuel Fortun ang nanguna sa paghandom ning siyudad sa ika-126 nga anibersaryo sa Rizal Day kansa mao ang adlaw sa pagkamatay sa atong nasudnong bayani nga si Dr Jose Rizal sa may Guingona Park sa sentrong bahin ning siyudad.
Ang nasangpit nga kalihukan nga gitambungan sa mga lokal nga opisyal apil na sa mga tri-people sama sa mga Muslim, Kristiyanos ug lumad.
Sa eksklusibong pakighinabi sa Bombo Radyo Butuan, gipadayag ni Mayor Fortun nga sama sa mi-aging mga katu-igan, susamang kasa-ulugan ra ang gihimo nga naghandom sa kinabuhi ni Rizal ug sa iyang nahatag nga kaayuhan sa atong nasud ilabina sa katawhang Filipino sama sa kagawasan nga ato karong natagamtaman.
Ang nakalahi matud pa mao ang lang ang mga performances, mga artists ingon man ang mensahe sa mga tawong nahatagan og kahigayunan nga makamapulong.
Sa iyang kabahinan, gipahinumdom niini ngadto sa tanan nga kung gikinabuhi man gani nato si Jose Rizal, mas maayong himuon usab nato ang atong kabahinan alang sa kaayuhan sa atong katilingban pinaagi sa pagsunod sa balaud.
Dugang mensahe niini ilabina sa kabatan-unan nga kung wala sila’y disiplina sa ilang kaugalingon, wala’y pagpakabana sa palibot nga maka-ayo sa tanan, pag-abot sa panahon nga sila na ang mudumala sa siyudad, wala usa’y mala-umang kaayuhan ang katawhan nga unta musalig kanila.
