BUTUAN CITY – Human ang unom ka adlaw, hingpit nang gitapos ang Bicameral Conference Committee Meeting alang sa 2026 General Appropriations Bill nga nagkantidad og ₱6.793 trillion.
Insaktong alas-2:22 kaganinang kaadlawon dihang gitapos sa Senate ug House contingents ang deliberasyon ug nasabutan ang wala magtukmang mga probisyon sa 2026 national budget apil ang kontrobersyal nga sugyot nga pondo sa Department of Public Works and Highways kon DPWH.
Apil sa gi-aprubahang alokasyon ang ₱961.3 bilyon alang sa Department of Education (DepEd) kansa mas taas kaysa sa National Expenditure Program kon NEP apan mas ubos sa Senate version nga ₱992.7 bilyon.
Anaa usab ang Assistance to Individuals in Crisis (AICS) nga mi-abot ngadto sa ₱63.9 bilyon kansa mas dako gikan sa ₱26.9 bilyon sa NEP ug ang ₱51 bilyon sa Department of Health (DOH) alang sa Medical Assistance for Indigent and Financially Incapacitated Patients (MAIFIP).
Samtang ang Department of Agriculture (DA) duna’y ₱10 bilyon alang sa Presidential Assistance to Farmers and Fisherfolk program ug ang Office of the Vice President (OVP), duna’y ₱889.2 milyon.
Ang bicam reconciliation mao ang katapusang ang-ang sa budget process sa Kongreso kondiin ang 2026 budget, gi-angkla sa edukasyon, panglawas, social protection, ug ayuda sa sektor sa agrikultura kansa nagpakita nga prayuridad sa gobyerno ang pagtabang sa katawhan ug pagpalig-on sa human capital.
