BUTUAN CITY – Dayag nga gikumpirma ni Vice President Sara Duterte nga wala’y nagasto ang lokal nga kagamhanan sa Davao City apil na ang gobyerno sa Pilipinas sa pagpabarog sa Davao-Bucana Bridge sa maong siyudad.
Kini ang reaksyon sa besi-presidente human nag-viral ang pag-angkon ni Pangulong Bongbong Marcos nga usa sa iyang mga legacy projects matud pa ang nasangpit nga tulay nga napunduhan niadtong hinapos nga bahin sa tuig 2023, dihang iya kining gi-inspeksyon ning mi-aging adlaw.
Samtang atua sa The Hague, Netherlands human gibisita ang iyang amahang si kanhi Pangulong Rodrigo Duterte, gipasalamantan sa besi-presidente ang kanhi pangulo tungod sa pagpangita og paagi nga mapunduhan ang grabe kadako nga proyekto nga gamit kaayo sa tanang mga sakyanang mutabok gihan sa amihanan padulong sa habagatang parte sa pulo sa Davao Region og vice versa.
Sigon ni VP Sara, naa na kini nga plano niadtong mayor pa siya sa maong siyudad atol sa termino sa iyang amahan apan giklaro niini nga wala sila’y pundo niini tungod kay bugtong gigahinan lamang nila mao ang costal roads rason nga si kanhi Pangulong Duterte ang nakigkutay sa China aron kini mariyalisar.
Giklaro ni VP Sara nga natapos ang maong proyekto nga wala’y bisan usa ka sentabo nga nagasto ang Pilipinas tungod kay gi-abaga kini sa China isip grant.
Dihang gikuhaan og reaksyon kalabot sa pag-angkon ni PBBM sa maong proyekto, gipadayag ni VP Inday nga nasayod niini ang presidente.
