BUTUAN CITY – Nanawagan ang grupong Marcos Resign Movement kang Pangulong Ferdinand Marcos Jr. nga mupa-ilalom sa hair follicle test aron matuldukan na ang nagpalibot nga isyu kaniya kalabot sa paggamit sa ilegal nga druga.
Sa interview sa Bombo Radyo Philippines, gibutyag sa kanhi chief of staff for public safety sa Department of the Interior and Local Government (DILG) retired Gen Warlito Daos, nga mao kini ang iyang nakitang paagi aron matin-awan ang publiko sa mga alegasyong gibato batok sa pangulo sa ingon mahunong na ang maong isyu.
Gidugang pa sa retiradong heneral ang pabor siya sa pamahayag ni Senador Imee Marcos, nga andam kining mutabang sa iyang manghod nga pangulo ug mosurender sa iyang pwesto sa Senado kung kinahanglan aron maremedyohan ang kahimtang niini.
Madumdumang gipadayag usab sa senadora nga andam silang mobalhin ug simple nga pagpuyo sa Ilocos Norte kung kinahanglan aron lang magpa-ayo o magpatambal ang pangulo
Gipadayag usab sa grupo ang ilang panawagan dungan sa Trillion Peso March nga gihimo kagahapon sa EDSA People Power Monument, pakighi-usab usab nila sa mga protesta batok sa korapsyon.
