BUTUAN CITY – Gisuspende na sa Malacañang ang klase sa tanang lebel ug trabaho sa gobyerno ugmang adlawa Lunes, Nobyembre 10, tungod sa kusog nga pagkuso-kuso sa Super Typhoon Uwan, base na sa gipagawas nga Memorandum Circular No. 106.
Ang maong desisyon base sa rekomendasyon sa National Disaster Risk Reduction Management Council (NDRRMC) kansa gipirmahan ni Executive Secretary Lucas Bersamin.
Apil sa wala’y trabaho ug klase ang National Capital Region (NCR); Cordillera Administrative Region (CAR) ingon man ang Regions 1, 2, 3, 4-A, 4-B, 5, ug 7.
Suspendido usab ang klase sa tanang lebel sa Region 6 ug sa Negros Island Region gikan Nobyembre 10 hangtod Nobyembre 11, 2025.
Apan giklaro sa Malacañang nga magpadayon gihapon ang trabaho sa mga ahensya sa gobyerno nga responsable sa paghatag og basic services, sama sa mga rescue, relief, ug emergency response offices samtang ang mga local chief executives gimanduang magpabilin sa ilang tagsa-tagsa ka lugar.
Samtang ang suspension sa trabaho sa mga pribadong kompanya magdepende sa diskresyon sa ilang management.
Sa laing bahin, nagpahibalo na usab ang House of Representatives nga suspensido ang trabaho sa Kamara ugma tungod sa Super Typhoon Uwan.
