BUTUAN CITY – Gipadayag ni International Criminal Court (ICC) Assistant to Counsel Atty. Kristina Conti nga mas maayo kung boluntaryong mosurender si Senador Ronald “Bato” Dela Rosa ug ilhon ang hurisdiksyon sa ICC.
Kini human migawas ang report nga nagpagawas na og warrant of arrest ang ICC batok sa senador may kalabotan sa kampanya kontra-droga sa administrasyong Duterte.
Gipasabot ni Conti nga kung madakpan ang maong senador, surender ug dili extradition ang proseso, tungod kay ang ICC usa ka internasyonal nga hukmanan ug dili usa ka soberanong estado.
Dugang pa ni Conti, ang extradition magamit lamang kung ang foreign warrant of arrest moagi pa sa lokal nga korte, samtang ang surender usa ka porma sa kooperasyon sa ICC alang sa mga miyembro ug dili miyembrong mga nasod.
Giklaro usab niini nga dili dapat panalipdan sa Senado si Dela Rosa ilabina kay wala pa siyay gihatag nga tubag sa mga seryosong akusasyon batok kaniya.
Ang iyang panawagan nagpunting sa pagpasiguro nga dili mahimong tagu-anan sa mga adunay kaso kriminal ang Senado.
