BUTUAN CITY – Mas gipasabot pa sa City Transportation, Traffic and Management Department kon CTTMD-Butuan ang pagpatuman na nila sa bag-ong Local Public Transport Route Plan (LPTRP) niadtong Biernes, Oktubre 24.
Ang nasangpit nga route plan, aduna’y pito la mga ruta aron mapalambo ang sistema sa pampublikong transportasyon ug masiguro ang organisado, episyente, ug luwas nga pagbiyahe sa mga pasahero.
Sigon ni Engr Karl Jun Arellano, ang hepe sa Planning and Data Management Division sa CTTMD, ang routes 1 ug 2 kaniadto, gihimo na nila karong route 1, kondiin ang biyahe gikan sa crossing sa Brgy Dumalagan, padagayday sa JC Aquino Avenue nga muliko dayon pawala ngadto sa North Montilla Boulevard dayon paliko sa T Calo St, lahos sa E Luna St padulong sa dalan sa may Guingona Park lahos na sa AD Curato St dayon sa Durano St tuyok sa South Montilla Boulevard pabalik sa JC Aquino Avenue hangtud na usab sa Dumalagan.
Ang maong ruta duna matud pa’y 83 ka mga aprubadong magbiyahian nga yunit. Samtang ang route 2 karon mao ang route 4 kaniadto kansang dagan, gikan sa Brgy Dumalagan hangtud na sa Langihan Road kansa wala’y nabag-o sa ruta gawas lang sa pag-usab sa route number nga duna’y 82 ka mga yunit.
Samtang ang route 3, mao ang mao ang route 10 kaniadto nga gikan sa Brgy Ampayon padulong sa Brgy Dumalagan apan ubos sa aprubadong bag-ong ruta, kutob na lang kini sa Brgy Libertad ug vice versa nga duna’y 80 ka mga yunit.
Samtang ang route 7 kaniadto nga duna’y rutang Langihan Terminal ngadto sa Brgy de Oro ug vice versa, gihimo na karong route 4 ug ang kaniadto route 8 nga duna’y rutang Langihan terminal ngadto na sa Brgy Sto Niño ug vice versa, gihimo na karong route 5 nga parehong duna’y tag-76 ka mga yunit.
Samtang ang gi-aprubahang route 6, mao ang bag-ong ruta kondiin gikan sa provincial capitol, mulabay kini sa Brgy Tagabaca, Pigda-ulan, Salvacion, hangtud Don Francisco ug vice versa kondiin duna kini 15 ka mga aprubadong units.
Ang katapusan mao ang route 7 nga mao ang kanhi route 12 kondiin gikan kaniadto sa provincial capitol hangtud sa Brgy Amparo, karon mulahos na kini ngadto sa Brgy Tungao ug vice versa kondiin duna kini 53 ka mga yunit.
