BUTUAN CITY – Tingkagol sa bilangguan ang usa ka amahan human gi-akusahan nga mikunsumo sa 4-anyos pa niyang kaugalingong anak nga babaye sulod sa ilang panimalay sa Brgy.76-A, Bucana sa Davao City.
Sigon sa inahan sa bata, nakita niyang nanarangka sa kwarto ang suspetsadong gitago lang sa pangalang Mar ka-uban ang ilang anak apan wala niya kini panumbalinga ug didto na siya nakulbaan dihang nakita niyang wala na’y sapot ang ilang anak ug nagdugo pa ang kinatawo rason nga dali niya kining gipa-medico legal.
Didto na nasuta nga duna gayo’y laceration ang kinatawo sa bata hinungdan sa gilusad nga operasyon sa mga sakop sa National Bureau of Investigation kon NBI-Southeastern Mindanao Regional Office nga miresulta sa pagkasikop sa suspetsado.
Gipanghimakak niini ang maong pasangil ug hinuon, iyang gibutyag nga butang-butang ra kini sa inahan sa bata aron matud pa, magka-uban na kini ug ang iyang bag-ong karelasyon.
