BUTUAN CITY – Gikumpirma ni Marissa Iting-Amante alyas Blezz nga midalikyat sa ilang panimalay kagahapong adlawa sa Purok 11, Brgy Sibagat, Agusan del Sur ang ilang mga barangay official pagpanguna ni Kapitan Arniel Abuzo uban ni Engr Mynard Cagmat, ang road right of way asset sa Department of Public Works and Highways kon DPWH-Agusan del Sur 1st District Engineering Office.
Kini aron makig-settle kanila human natuki dinhi sa Bombo Radyo, ang pugsanong pagpaguba sa ilang panimalay tungod kay ma-igo matud pa sa padayong konstruksyon karon sa flood control project.
Sigon sa ginang, wala malikayi nga mitaas ang tingog sa iyang bana dihang nakig-istorya ngadto sa kapitan, tungod sa pagpamugos nila kaniadto nga kasuhan sila kung dili gub-on ang ilang panimalay ilabina nga nahuman na og guba ang balay sa ilang unom ka mga silingan.
Apan dihang natuki na sa Bombo Radyo ang maong isyu, dinhi nasuta nga mahimo man diay’ng masabutan ang maong problema aron makakuha og win-win solution.
Tungod niini, gi-demand sa magti-ayong Amante nga makig-settle lamang sila og ihatag na kanila ang dugay nang gisaad sa barangay council nga buhatan sila og tangke sa tubig o kaha bomba ug ibalik usab ang ilang balkon nga giguba tungod sa bahad sa maong mga opisyal.
Tungod niini nga kalambuan, gipasalamatan niya ang Bombo Radyo Butuan nga maoy nahimong dalan nga wala madayon pagguba ang ilang balay taliwa sa kagahi sa ilang mga barangay officials sa ilang hangyo hangtud nga natuki sa Bombo Radyo ang ilang concern.
