BUTUAN CITY – Gi-angkon ni Engr Brice Hernandez, kanhi assistant district engineer sa Department of Public Works and Highways kon DPWH-Bulacan 1st District Engineering Office nga ang tanang proyektong ilang gipatuman sa tulo ka mga distrito, pulos substandard.
Kini tungod matud pa sa obligadong paghatag nila sa 25 ngadto sa 30-porsientong commitment gikan sa kinatibuk-ang pundo sa matag-proyekto ngadto sa proponent niini.
Sa pagdungog sa Senate Blue Ribbon Committee, gipadayag ni Hernandez nga apil niini nga mga proyekto ang kadalanan, tulay, multi-purpose ug school buildings, ingon man overpriced kaayo nga streetlights.
Panahon sa pagpatuman na sa proyekto, pahinumduman matud pa sila ni kanhi DPWH Undersecretary for Operations Engr. Roberto Bernardo, kung unsaon pag-atake ang proyekto aron lang dili mapalta ang paghatag nila sa 30-porsientong commitment ngadto sa proponent sa proyekto.
Dihang gipangutana ni Senador Bam Aquino, gipadayag ni Hernandez nga wala sila’y tarong nga proyekto bisan usa lang tungod sa mga porsientong gipangayo kanila.
Nagsugod matud pa kini sukad mi-abot sa ilang buhatan si Engr Henry Alcantara niadtong tuig 2019 hangtud sa kasamtangan.
Dihang gipangayuan sa iyang opinyon kalabot niini si kanhi DPWH Sec Manuel Bonoan, gipadayag niining wala siya’y kasayuran niini tungod kay karon lang matud pa niya nadungog ang maong modus.
Dugang pa sa kalihim, dapat nagsubmite matud pa ang maong buhatan sa ilang monitoring report ug ubos matud pa sa iyang pagdumala, in-charge niini si Bureau of Construction Director Engr Allan Borromeo.
