BUTUAN CITY- Gihagit ni Senate Deputy Minority Leader Risa Hontiveros si Pangulong Ferdinand ‘Bongbong’ Marcos Jr nga manguna sa pagpa-ilawom sa lifestyle check human mitumaw ang mga kontrobersyal nga mga flood control projects.
Gipamugos ni Hontiveros nga angay lamang nga magpakita og ehemplo ang pangulo pinaagi sa pagpahibalo sa iyang Statement of Assts, Liabilities and Net Worth kon SALN.
Sigon ni Hontiveros, kung limitado ra sa ehekutibo ang direktiba sa lifestyle check ni Pangulong Marcos, puwede gihapon nga makighi-usa ang Kongreso ug ang Hudikatura.
Gibutyag niini, aduna’y kagahom ang Senate President, ang House Speaker ug ang Chief Justice sa Korte Suprema nga dasigon ang mga senador, kongresista, ug mahistrado nga ipahibalo sa publiko ang ilang SALN ug ipasusi ang ilang pamuyo kondiin mahimo matud pa usab nga manguna niini ang minority bloc nga gilangkuban nila Senate Minority leader Vicente ‘Tito’ Sotto III, ingon man ang mga senador nga sila Loren Legarda, Pandfilo Lacson ug Juan Miguel Zubiri.
Kung mapatuman ang lifestyle check, usa sa mga posibleng magdumala niini mao ang Office of the Ombudsman sama sa gihimo nila ningmi-aging mga katu-igan.
Una nang gibutyag ni Senadora Imee Marcos nga angay nga manguna ang mga magbabalaud sa pagpailawom sa lifestyle check tungod kay isip mga lider sa nasud, sila ang unang motuman sa direktiba sa pangulo.
