BUTUAN CITY – Pito lang sa 15 ka mga contractors sa mga flood-control projects nga gi-imbitar sa Senate Blue Ribbon Committee alang sa ilang motu propio inquiry in aid of legislation, ang mitambong sa pagdungog ning mga orasa, taliwa nga gipadalhan sila og imbitasyon niadto pang Biernes, Agusto 15 ning tuiga.
Sa gihimong attendance checking ni committee chairman Rodante Marcoleta pinaagi sa ilang director general, nasuta nga sa gipadalang mga imbitasyon, onse lang kanila ang mi-reply apan sa aktwal nga pagdungog, pito lang ang mitunga apan pulos lang ilang mga representatives.
Tungod niini, nagmosyon gilayon si Senador Ronald ‘Bato’ de la Rosa nga padalhan og subpoena ang mga contractors nga wala mitunga sa pagdungog o kaha wala magpadala sa ilang representatives, aron mapugos sila pagtunga sa sunod nga hearing.
Samtang gisugyot usab ni Senador Erwin Tulfo nga kinahanglang sa pagtunga sa mga contractors nga padalhan og subpoena, duna’y mapresenta nga resonableng tubag sa ilang pag-absent sa pagdungog ning adlawa.
Kinahanglan matud pang mabati sa mga resource persons nga dili nila mahimong bu-angon ang mga Senado sa paghatag lang og mga mabaw nga rason aron lang makalikay sa paggisa kanila.
Sigon ni Senador Erwin Tulfo, dili basta-basta nga balewalaon lang sa mga gi-imbitar nga resource persons ilabina sa mga contractors ang ₱545B nga gitagang pundo alang sa mga flood-control projects aron kini ibulsa lang ug hatagan lang og sub-standard kaayo nga proyekto ang katawhan.
