BUTUAN CITY – Unom ka mga airport personnel sa Pilipinas ang gitangtang na sa trabaho human nagpositibo sa paggamit og ilegal nga droga sa gihimong random drug test isip kabahin sa mas gipakusgang kampanya sa Civil Aviation Authority of the Philippines (CAAP) batuk sa ilegal nga droga sa sektor sa aviation.
Tinguha sa kampanya sa CAAP nga mamintina ang mental ug physical fitness sa mga aviation personnel alang sca kaluwasan sa publiko.
Madumdumang niadtong tuig 2024, mikunhod sa lima ang ihap sa mga CAAP personnel nga nagpositibo sa droga, gikan sa 16 niadtong tuig 2023.
Ang tanang nagpositibo, pulos mga contractual security personnel ug wala’y regular nga empleyado kondiin ang gipa-ilalom sa random drug testing, mao ang 2,474 ka mga empleyado gikan sa 44 sa mga airports sa nasud, base na usab sa pagsunod sa Republic Act 9165 kon mas nailang Comprehensive Dangerous Drugs Act of 2002.
Base sa balaud, ang mga empleyado sa gobyerno nga magpositibo sa droga, angayan lang tangtangon gikan sa serbisyo.
