BUTUAN CITY – Nasikop na sa ginsakpan sa Butuan City Police Station kon BCPS-3 ang habal-habal driver nga gika-ingong nanglugos sa iyang pasahero ug mikawat sa iPhone 7 niini kagabii sa payag nga bahin sa may National Irrigation Administration kon NIA canal sa Brgy. Pinamanculan ning siyudad.
Ang suspetsadong si alyas John Paul, residente sa Brgy. 1, Poblacion, lungsod sa Buenavista, Agusan del Norte, nasikop sa may Brgy. Matabao sa maong lungsod, wala ra’y 24-oras human sa maong insidente.
Nasayrang human midangop sa barangay office sa Pinamanculan ang 19-anyos nga biktimang gitago lang sa pangalang Inday, gidangop gilayon kini ngadto sa BCPS-3 ug sa Buenavista Municipal Police Station hinungdan sa gilusad nga hot pursuit operation hangtud misangpot sa pagkasikop human kini gitudlo mismo sa biktimang mi-uban sa operasyon sa kapulisan.
Wala na marekober ang cellphone sa biktima samtang giklaro sa inahan sa suspetsado nga wala kini namasada tungod kay nagtrabaho matud pa kini kagabii.
