BUTUAN CITY – Gibatikos ni Akbayan Rep. Perci Cendaña ang pagduso og resolusyon sa Duterte bloc kalabot sa hingpit nang pagpapa-uli dinhi sa nasud ni kanhi Pangulong Rodrigo Duterte.
Ang Duterte bloc gilangkuban sa mga senador nga misuporta sa kanhi pangulo sama nila Senador Robin Padilla, Ronald ‘Bato’ de la rosa, ug Christopher ‘Bong’ Go. Sigon ni Cendaña, ang gihimo sa maong grupo nagpakita lang sa pagka-bias sa Senado sa hisgutanan sa kanhi pangulo.
Gi-apil pa sa kongresista ang impeachment case ni Vice President Sara Duterte nga pila ka buwan matud pang gipatulog sa Senado bisan og dugay na kining gi-endorso sa kamara.
Samtang ang resolusyong giduso sa mga ka-alyado ni Duterte, paspas nga gipakanat sa Senado. Bisan pa man niini, nagtuo ang Akbayan representative nga wala pa gihapon kini epekto sa gi-atubang nga kaso sa kanhi pangulo tungod kay ang International Criminal Court kon ICC ang mudungog niini.
Aminado usab si Senador Robin Padilla nga mipirma sa maong resolusyon sila Senador Bong Go ug Bato de la Rosa aron mapapa-uli na sa nasud ang kanhi pangulo.
Giklaro ni Padilla nga labaw pa kini sa usa ka resolusyon tungod kay panawagan usab kini alang sa panaghi-usa sa katawhang Filipino, pagrespeto sa soberiniya ug hustisya alang sa pangulo nga matinud-anong nagserbisyo sa nasud.
