BUTUAN CITY – Malampusong nasikop sa ginsakpan sa Butuan City Police Station 2 kon BCPS2 ang suspetsado sa pagpamusil ug pagpangluba patay, kagahapon sa udto sulod sa opisina sa usa ka construction company sa may Intino building, Brgy. Ong Yiu ning siyudad sa Butuan.
Naila ang biktima nga si Rodel Gonzaga Valenzona, 42-anyos, duna’y ka-ipon ug residente sa Village 2, Brgy Libertad ning siyudad sa Butuan samtang ang suspek, na-ila usab nga si Michael Chavez, residente sa Purok 7, Brgy. Banza ning siyudad kinsa nag-inom matud pa og hilo human sa maong hitabo ug gidala na sa ospital alang sa pagpatambal.
Sigon pa ni Butuan City Police Office Spokesperson PCapt. Fritzcel Cubillan, padayon pa ang ilang gihimong imbestigasyon sa tinuod nga motibo sa kremin bisan pa man sa una nang mitumaw nga posibleng selos ang anggulo niini.
Dugang pa ni PCapt. Cubillan, kalit lang misulod sa opisina nga gitrabahuan sa biktima ang suspek dayong pusil niini diha sa iyang tuong abaga gamit ang improvised shotgun ug gisundan na pagluba-luba sa nagkada-iyang parte sa lawas hinungdan sa iyang hinanaling kamatayon.
Daling gidala ang suspek sa Butuan City Medical Center kon BMC tungod kay mi-inom matud pa kini og hilo human sa maong panghitabo.
Nanimaho matud pa kini ug thinner base na usab sa nasimhot nila sa baba sa maong suspek. Sa kasamtangan, hugot nga gibantay sa kapulisan ang suspetsado.
