BUTUAN CITY – Malampusong napasikop sa usa ka amahan ang usa ka lalaking dentista human gisumbong sa anak niining pila ka higayon na siyang gi-harass sexually sukad pa ning mi-aging tuig dihang nagpaserbisyo sa iyang ngipon.
Sa asuy sa amahang si alyas Oscar kinsa personal nga midangop sa Bombo Radyo Butuan, nadakpan na kagahapong adlawa ug nagtingkagol na ang suspetsadong nag-clinic sa usa ka mall sa may Brgy. Tandang Sora ning siyudad, human ang makuti nga legal nga lakang nga iyang gihimo.
Asuy sa amahan, sukad nagpa-brace ug nagpa-tooth expander ang iyang 14-anyos na karong anak nga dalagita ning mi-agi pang tuig, kada-duha ka adlaw kining gipabalik sa dentista alang sa iyang expander samtang kada-buwan usab alang sa iyang brace.
Bag-uhay pa kini misumbong kaniya human nga ang sa sinugdanan gitu-uhan sa bata nga nasaghiran ra ang iyang dughan, gikumot na kini ning mi-aging adlaw rason sa pagsumbong niini ngadto sa hinigugma sa iyang kuya hangtud nga mitug-an na kini kaniya.
Pursigido ang amahan nga tangtangan og lisensya ang maong dentista ug mapasira ang klinika niini aron mahatagan og hustisya ang nadangatan sa iyang anak ug sa uban pang posibleng nabiktima niini.
Kasong paglapas sa Republic Act 7877 kon mas nailang Anti-Sexual Harassment Act ang iyang gipasaka batuk sa suspetsado.
