BUTUAN CITY – Gipasakaan na og kaso pinaagi sa inquest proceedings ang duha ka mga indibidwal nga nalambigit sa pagpang-scam sa mga online financial accounts human ang malampusong paglusad nga entrapment operation pasado alas-nueve sa gabii sa Brgy. Talisay, lungsod sa Nasipit, Agusan del Norte.
Mismong ang mga sakop sa Regional Anti-Cybercrime Unit kon RACU-13 ang nanguna sa operasyon ilawom sa liderato ni PLt. Ibn Rashid Injal, hepe sa Operations and Digital Forensic Section uban sa pag-abag usab sa mga opisyal sa barangay.
Sa eksklusibong pakighinabi sa Bombo Radyo Butuan, gibutyag ni Lt. Injal nga ilang gihimo ang operasyon human sa ilang cyber-patrolling activities nga nag-target sa online selling sa mga peke nga financial accounts.
Gika-ingon nga ang mga suspek nga gi-ila lang sa mga alyas nga Toper, 38-anyos, ulitawo, residente sa Purok Tanguile ug alyas Ishing, 38-anyos, minyo, residente sa Purok Molave sa susamang barangay, nasapon nga naghanyag og usa ka verified GCash account nga duna’y credit limit nga tunga sa milyon ka pisos sa kantidad nga P3,000 kada-SIM card.
Magamit matud pa kini via Facebook account ID sa grupong “ANGKAS HABAL | Butuan City – Extra Services.
Nakuha gikan sa ilang posisyon ang tulo ka mga SIM cards, usa ka mobile phone, siyam ka tag-usa ka libo ka pisos nga pekeng kwartang papel ug usa ka tinuod nga usa ka libo pa pisos nga kwartang papel.
