BUTUAN CITY – Hangtud sa pagkutlo ning balita, wala pay tubag ang kampo ni Panabo City Mayor Jose E. Relampagos sa pagpangulata matud pa niini og sa iyang mga bodyguard ngadto sa usa ka mediaman nga si Oliver Autor pasado alas-12:30 kagahapon sa udto sa may Purok 1, Upper Licanan, Panabo City, Davao del Norte.
Desididong mupasaka og kaso ang maong Mediaman tungod sa maong panghitabo nga na-atol sa gipahigayong usa ka press conference sa Mayor.
Nasayran nga gipatawag matud pa si Autor ni Mayor Relampagos ug gipangutana nganong ginatira siya niini.
Mitubag si Oliver nga wala matud pa siya mangdaut sa Mayor, ug mibarog lang matud pa siya base sa mga impormasyon nga iyang nahipos.
Apan mi-init pa ang ilang diskusyon hangtud nga kalit siyang gitadyakan sa Mayor ug wala pa kini makabantay nga aduna’y mga bodyguards niini ug gitabangan siya og kulata.
Gibutyag usab sa mediaman nga wala pa nakontento ang Mayor og gisumbag pa siya sa baba.
Gawas usab sa pagsumbag ug pagkulata kaniya, gitiunan matud pa siya og pusil sa mga bodyguards ni Mayor Relampagos.
