BUTUAN CITY – Dead-on-the-spot ang usa ka 52 anyos nga lalaki human gipusposan og kahoy sa iyang magulang nga lalaki bandang ala 1:20 sa kaadlawon sa nakalabay nga adlaw sa MOJON, Brgy. Calasga-an, Bais City, Negros Oriental.
Naila ang biktima nga si Mario Lado, ulitawo, residente sa maong dapit samtang ang suspek nga iya ra usab nga magulang giila nga si Renato Lado, 56 anyos ug residente sa Palanas, Brgy. Sta. Cruz Viejo, Tanjay City.
Base sa imbestigasyon sa Bais City Police Station, hubog nga mipauli ang biktima sa iyang pinuy-anan ug giguba niini ang ilang balay.
Gibadlong kini sa magulang apan gipusil hinuon kini sa biktima gamit ang Colt caliber 45 ug naigo ang dapit sa walang dughan duol sa abaga.
Isip panimalos, mikuha og kahoy ang magulang og gipusposan ang biktima sa makadaghang higayon nga miresulta sa iyang hinanaling kamatayon.
