BUTUAN CITY – Gi-anunsiyo sa Mindanao Development Authority kon MinDA nga pabiling malinawon ang Caraga Region kondiin ang Dinagat Islands maoy gideklarang pinaka-luwas nga probinsiya sa entiro rehiyon.
Kini base sa pinaka-ulahing Mindanao Trust, Respect, and Safety Study kon M-T-R-S-S survey kondiin gipresenta ngadto sa Police Regional Office-13 ang taas nga level of public satisfaction sa performance sa kapulisan sa rehiyon.
Ang Police Regional Office-13 nakadawat og 91-percent nga satisfaction rating, 89 percent sa respect and trust, 88 percent sa security, ug 87-percent sa safety.
Gitumbok ni Dr. Adrian Tamayo, public relations chief sa MinDA, nga ang M-T-R-S-S usa ka scientific baseline survey sa public safety, satisfaction, ug serbisyung gihatag sa kapulisan.
Ang M-T-R-S-S survey, nga nagsugod niadtong 2022, gipangunahan sa Mindanao Development Authority gamit ang sampling design og random selection sa mga respondents gikan sa mga residente, torista og biyahedor nga nag-edad 18-anyos pataas.
Ning tuiga 1,202 ka mga respondents ang misalmot sa survey dinhe sa rehiyon.
