BUTUAN CITY – Gipresenta kagahapong adlawa ngadto sa publiko ang 5 ka mga armadong lalaki nga nasikop sa probinsiya sa Surigao del Sur.
Naila ang mga suspek nga sila 1. Logiemar Tembrevilla Besas, kanhe sundalo, resident osa f Lurogan, Valencia City, Bukidnon; Michael Angelo Wayan Tolibas, kanhe usab sundalo, resident sa Patag, Opol, Misamis Oriental; Jessery Abordo Deque, resident sa Peñaranda, Nueva Ecija; Jerry Samblay Torres, resident sa Nguyan Jaen, Nueva Ecija; og Noel Valdesoto Flores, residente sa Malimba, Gapan, Nueva Ecija.
Samtang gipresenta usab ang nakumpiskang mga armas nga duha ka kalibre .45 pistola nga dunay duha ka magazines, usa ka caliber .30 rifle, og duha usab ka granada.
Ang mga suspetsado nag-atubang sa kasong may kalapasan sa Republic Act (RA) 10591 o the Comprehensive Firearms and Ammunition Regulation Act diin ang matag-usa dunay girekomendang piyansa nga 120-mil pesos apan walay piyansa sa laing kaso nga pagsupak sa RA 9516, o law on illegal possession of explosives.
Gipangunahan mismo ang pagpresenta sa mga niini ni Surigao Del Sur Governor ALEXANDER T. PIMENTEL.
Nasayran nga nasikop ang mga niini sa dihang gihimo ang hot pursuit operation sa elemento sa Hinatuan og Barobo Municipal Police Stations, kauban ang 67th Infantry Battalion, Philippine Army sulod sa girentahang balay sa Barangay Poblacion, Barobo, Surigao del Sur niadtong Nobyembre 14.
Una nang misibat ang duha sa mga suspek gikan sa police checkpoint sa Hinatuan, Surigao del Sur human na-obserbahan sa otoridad ang mibukol nga armas diha sa tactical bag samtang sakay sila sa single motorcycle.
Pinaagi sa tabang sa kasundaluhan og lokal nga opisyales, natud-an ang nahimutangan sa mga suspek diin lakip sa nakuha ang maong single motor.
Sumala sa imbestigasyon, ang maong grupo mihimo og pagpang-recruit gikan sa Bislig City ngadto sa Barobo diin gisubay-bayan sa otoridad ang ilang aktibidad tungod sa alegasyong pag-surveillance sa political activities sulod sa probinsiya.
