BUTUAN CITY – Kasong may kalapasan sa Sections 5, 11, og 12, Article II sa R.A. 9165 ang giatubang karun sa magti-ayon human naaresto sa gihimong drug buybust operation bandang alas 2:15 ang takna sa hapon sa nakalabay nga adlaw sa Purok-8, Payawan II, Barangay Luna, Surigao City.
Naila ang mga nadakpan nga sila Richard de asis, 44-anyos, usa ka driver sa mining company ug Jessa de asis, 34-anyos, kanhe magtutudlo sa usa ka kolehiyo og karun usa ka online teacher nga parehong residente sa Purok-1, Barangay Canlanipa, Surigao City.
Base sa impormasyon, gihimo ang buybust operation sa Barangay Cagniog apan nakasimhot ang mga suspek nga pulis ang ilang ka-transaksiyon rason nga misulay kini sa pagsibat sakay sa usa ka puting sakyanan nga dunay plaka numero UGA 777.
Nag-ginukdanay pa kini sa otoridad hangtud nga na-corner pag-abot sa Payawan II, Barangay Luna tungod kay flat na ang mga ligid niini tungod sa pagpusil sa mga pulis. Gane, naka-disgrasya pa ang magti-ayon atol sa ilang pagsibat og mga single motor.
Nakumpiska atol sa operasyon ang 11 ka plastic sachets sa suspected shabu nga mitimbang og 23 gramos nga dunay gibana-banang mokantidad usab og kapin 156-mil pesos. Lakip sa nakumpiska ang usa ka 1,000. Peso bill nga gigamit isip marked money; 30 ka tag-usa ka libo ka pesos nga boodle money; usa ka cellphone; usa ka sakyanan og nagkadaiyang mga drug paraphernalia.
Gipalawman pa ang imbestigasyon ilabina ang pagpamatood kung duna bay kahibalo ang asawa sa trabaho sa iyang bana ilabina kay nasutang ang target sa operasyon mao ang iyang bana. Apan sa karun, parehong nagtingkagol sa Surigao City Police Station alang sa tukmang disposasyon.
