BUTUAN CITY – Padayon karun ang lawom nga imbestigasyon sa natigayong pagpamusil sa Purok-8 Langihan road, Barangay Limaha ning siyudad sa Butuan pasado alas 9:55 sa nakalabay nga gabii.
Sigon ni PLt. Crispulo Alburo, tigpamaba sa Butuan City Police Office, nga naka-angkon ug usa ka samad pinusilan diha sa tuong parte sa paa ang biktimang si Rodulfo Perez jr, walay trabaho, dunay kapuyo nga residente sa maong dapit.
Kini bisan paman nga muabot sa 16 ka basyo sa bala ang narekober sa nahitaboan, lakip na ang usa ka magazine nga walay sulod nga bala.
Lakip sa gikumpirma sa opisyal nga gipanag-iyahan sa biktima ang narekober usab nga 4 ka sachet nga dunay sulod sa gitoohang shabu diha sa helmet sa biktima.
Nasayrang base sa imbestigasyon, duha ka single motor nga dunay tag-duha ka sakay nga padulong sa Langihan Public Market ang nagpinusilay sa maong dapit hangtud nga nahagbong ang biktima og natumba ang gisakyang single motor.
Samtang ang mga suspek misibat usab sa wala na masutang direksiyon.
Nagpadayon karun ang hotpursuit operation sa posibleng pag-ila sa misibat nga mga suspek samtang nakig-alayon ang kapulisan sa barangay og kasikbit nga mga establishemento aron makita ang posibleng kuha sa CCTV.
