BUTUAN CITY – Gitangtang na sa Philippine Institute of Volcanology and Seismology kon PhiVolcs ang gi-isyu nilang tsunami warning sa pipila ka mga coastal areas sa nasud human ang kusog nga linog nga mitay-og sa Taiwan kaganinang buntag.
Base sa datus sa ilang mga sea level monitoring stations, wala’y natala nga sea level disturbances sugod kaganinang alas-7:58 sa buntag hangtud sa pagtangtang sa warning pinaagi sa ilang gipagawas nga Tsunami Information No. 2 kaganinang alas-10:33 sa buntag.
Madumdumang apil sa mga residente nga gipa-alerto sa ahensya sa posibleng tsunami kadtong anaa sa kabaybayunan sa mga lalawigan sa Batanes, Cagayan, Ilocos Norte, Isabela, Surigao del Norte ug Sur ingon man Dinagat Islands.
Sigon sa Central Weather Administration sa Taiwan, natigayon ang pagtay-og pasado alas-7:58 sa buntag kansang epicenter nasubay sa gilay-ong 25 kilometros sa habagatang sidlakan sa Hualien Count sa capital Taipei.
