BUTUAN CITY – Padayon ang pagresponde sa mga sakop sa City Social Welfare and Development kon CSWD-Butuan sa panginahanglanon sa mga nabahaang residente ning siyudad sa Butuan ilabina kadtong anaa sa mga evacuation centers.
Sigon ni John Michael Acuzar, tigpamaba sa maong departamento, mi-abot na sa 22 ka mga barangay ang nabahaan kansang mga apektadong residente, temporaryong nagpuyo sa 36 ka mga evacuation centers.
Sa pagkutlo niini nga balita, mi-abot na sa 2,958 ka mga pamilya ang apektado sa kalamidad ug natunulan na nila og mga ayuda ilabina nga sa ingon niini nga sitwasyon, daghan ang dili makatrabaho ug makapangita og ipakaon sa ilang pamilya.
Bisan og mimaayo na og dyutay ang lakat sa panahon ning siyudad, apan padayong misaka ang ihap sa mga bakwit nga gitawag na karong internally displaced persons kon IDPs ug mipasalig ang opisyal nga kaya gihapon nila silang mapakaon tungod kay duna’y igong pundo ang lokal nga kagamhanan apil na ang ilang rehiyunal nga buhatan.
Wala matud pa’y angayang kabalak-an kung hisgutan ang panglawas sa mga bakwit tungod kay duna sila’y gipangbutang nga camp manager sa matag-evacuation center nga maoy mututok sa ilang kahimtang.
Duna usab sila’y lugar nga alang sa mga bata ug kababayen-an kansa luwas nga ka-istaran.
