BUTUAN CITY – Mokabat na sa 100 ka ektaryang kahumayan ang nadaot sa tibuok Caraga Region hatod sa nakalabay nga shearline ingon man sa low pressure area kondiin grabeng naapektuhan ang Sta. Josefa, Agusan del Sur.
Sa kasamtangan, on-going pa ang validation sa National Irrigation Administration kon NIA-Caraga sa mga kadaot nga hatud sa daut nga panahon ngadto sa mga irrigation systems ingon man sa mga dams.
Sumala pa ni NIA-Caraga regional manager Engr. Ruby Tuan, dili pa nila masuta ang insaktong ihap sa mga kadaot ilabina sa mga dams ug sa mga nag-unang kanal tungod kay puno pa man kini sa tubig rason nga dili pa nila makita ang mga nangaliki o kaha nangabu-ak nga mga semento.
Dugang sa opisyal, sa kasamtanan, anaa pa lamang sa 70% nga physical accomplishment ang nakab-ot sa ilang buhatan sa 2023 projects, kansang pondo gikan sa General Appropriation Act ug wala pay pondo gikan sa mga foreign investors.
Alayon niini gipaniguro usab ni Engr. Tuan nga mas gipalig-on pa nila ang mga serbisyo alang sa mga mag-uuma sa rehiyon.
