BUTUAN CITY – Padayon ang pagpanghatag og ayuda sa mga personahe sa Department of Social Welfare and Development kon DSWD-Caraga ngadto sa mga lalawigan sa Caraga Region nga na-apektuhan sa magnitude 7.4 nga linog sa Hinatuan, Surigao del Sur niadtong Disyembre 2.
Sa taho sa Disaster Response Operations Monitoring and Information Center kon DROMIC, mi-abot na sa ₱21.5-milyones nga kantidad sa humanitarian assistance ang nahatag ngadto sa mga apektadong lugar sa Caraga ug Davao Regions.
Adiser kini gipanghatag, gi-inspeksyon una og maayo ang mga Family Food Packs- FFPs sa regional warehouse aron masiguro ang kalidad sa mga relief supplies alang sa mga disaster-affected families.
Ang maong inisyatiba regular nga gihimo aron masiguro nga ang ensakto ug anaa sa highest standard nga mga relief goods ang matunol higayong masiguro ang expiration date ug quantity sa mga niini.
Mi-abot sa 12,846 ka mga family food packs ang gipang-apod apod sa mga personahe sa Department of Social Welfare and Development kon DSWD-Caraga kagahapong adlawa lang ngadto sa upat ka mga lungsod ug usa ka siyudad sa Surigao del Sur human na-apektuhan sa kusog nga linog.
Sa Tandag City, mi-abot sa 3,941 ka mga family food packs ang napang-apod apod samtang sa lungsod sa Cortes, mi-abot sa 4,500. Didto sa lungsod sa San Miguel, mi-abot sa 1,600 samtang sa San Agustin – 1,089 ug sa Carrascal, mi-abot sa 1,716.
Ning adlawa, laing batch na usab sa mga family food packs ang gipang-apod apod aron makuha-kuhaan ang palas-anon sa mga apektadong indidbidwal ilabina kadtong nawad-an sa ilang pinuy-anan.
