BUTUAN CITY – Na-ugdaw sa nahitabong sunog ang upat ka balay sa P-6 Barangay New Society Village ning syudad pasado ala una kagahapon nga daling gi-respondehan sa Bureau of Fire Protection kauban ang City Disaster Risk Reduction and Management Office kun CDRRMO ug mga volunteer fire brigades.
Base sa inisyal nga report sa Bureau of Fire Protection kon BFP-Butuan, nagsugod sa kusina sa usa ka balay ang sunog kansa gama lamang sa light materials. Sigon ni Sultan Gamal Amerol dihang nahinabi ning sibyahan, wala ma-apil pagkasunog ang ilang moske ug kadaghanan sa mga nasunugan, mgfa negosyante dungan sa pagbutyag nga wala’y indibdiwal nga na-trap sa ilang pinuy-anan.
Anaa matud pa sa 90% ka mga gamit sa mga residente ang naugdaw tungod kay ang uban wala man sa ilang panimalay dihang nahitabo ang sunog.
Sumala usab ni Sunaymah Ratchamoda, usa sa mga nasunugan, naa matud pa sya sa iyang balay nanglaba dihang nabantayan niyang anaa na sa iyang panimalay ang kalayo.
Tungod sa kakusog sa hangin, paspas kining mikuyanap rason nga walay maskin usa ka gamit siyang nasalbar. Kasamtangan karong misilong ang mga residenteng nasunogan sa covered court sa ilang Barangay.
Samtang pagka-alas-kwatro sa hapon, nasunog usab ang dos-andanas nga balay ni Ponsolador Quinisala Tumuling III, sa Purok-2 Lilo, Barangay Banza ning syudad sa Butuan kansa daling ningtabok sa balay sa ig-agaw niining si Henry Radaza Quinisala.
Sigon ni Fire Officer 3 Ben Sergio Pelletero, gawas sa duha ka balay nga gilamoy sa kalayo, nadamay usab ang sakyanang Ford Ecosport nga naka-parking sa panimalay ni Ponsolador.
Sigon sa mga saksi, gisulayan pa paghandos sa mga silingan ang maong sakyanan pagawas sa balay nga nasunog, apan pakyas sila tungod kay naka- lock man kini.
Gibana-banang anaa sa 500-mil pisos ang initial nga damyos sa maong sunog, wala pa kini labot sa nasunog nga sakyanan
