BUTUAN CITY – Mi-abot na sa halos 100 ka mga tawo ang patay tungod sa grabeng sunog nga mi-igo sa Lahaina, Hawaii. Sigon ni Hawaii Governor Josh Green, 93 ka mga tawo ang kumpirmadong patay nga posibleng madugangan pa samtang padayon pang gisuta ang identity sa ubang mga biktima.
Base sa report sa Federal Emergency Management Agency kon FEMA, anaa na sa kapin 2,200 ka mga istruktura ang na-ugdaw gumikan sa maong sunog.
Sa inisyal nga pagbana-bana, mi-abot na sa $5.5 billion ang damyos diin liboan ka mga residente ang nawad-an sa ilang mga panimalay.
Sumala usab sa mga otoridad sa Hawaii, ila nang gi-imbestigahan ang ang maong insidente, partikular ang pagdumala sa sunog.
Ang ubang mga magbabalaod sa estado nag-ingon nga ang mga opisyal nagpaka-ubos sa kapeligro ug ang mga residente usab nagbutyag nga walay mga pasidaan nga gihatag kanila.
