BUTUAN CITY – Wala’y duda ang pamilya Balili sa gihimong paghunos sa kinabuhi sa 34-anyos nga ulitawong si Benjie human kini napalgang nagbitay na sa punuan sa mangga kaganinang alas-dose sa udto sa gawas sa ilang balay sa Purok 1-A. Brgy. Ampayon ning siyudad sa Butuan.
Sigon sa usa ka magtutungha, pabalik na sila sa tunghaan dihang iyang nakita uban sa duha niya ka mga ka-ubang bata nga nagbitay na ang biktima rason nga dali nila kining gisumbong ngadto sa amahan niini.
Samtang gisaysay usab sa amahan sa biktima sa eksklusibong pakighinabi ning sibyahan nga naghambin sa sakit sa lawas ang iyang anak human nabanggaan samtang nag-eskwela og pastor sa may Brgy. Libertad ning siyudad.
Nadala matud pa kini sa ospital apan tungod sa kawala’y doktor, gi-uli kini rason nga wala gayod matud pa kini mahiling sa doktor rason nga ila na lang gitambal-tambalan.
Gitu-uhan sa amahan nga gawas sa pagka-igo sa bat-ang sa biktima atol sa hitabo, posible matud pa nga nabunal ang ulo niini tungod kay human sa insidente, namatikdan man niya nga duna’y panahon nga dili na kini mamao sa iyang paminsar.
Musulti matud pa kini kaniya nga gikapoy na sa iyang kinabuhi hangtud nga misangpot gayod kini sa kagustuhan niining tapuson na ang iyang kinabuhi.
Samtang sakit usab alang kang Bernard Balili ang gihimong paghunos sa kinabuhi sa iyang maguwang nga si Benjie tungod kay gipaningkamutan man nilang matambalan kini luyo sa ilang kalisod.
Gani, gidala pa nila kini sa ospital kaganinang buntag ug gihulat na lang unta ang resulta sa gipa-ilawman niining eksaminasyon.
Sigon ni Bernard, dili siya makatuo sa gihimo sa iyang maguwang tungod kay nagtuon pa kini sa pag-alagad sa Ginoo.
Bisan matud pa og duna na kini deperensya sa pangisip apan gipabilin pa gihapon ang kabu-utan niini ug pagkamatinabangon.
