BUTUAN CITY – Nangayo og dispensa ngadto sa katawhang napalaw human nag-atang unta sa gitakda nga river float parade kaganinang buntag sa may Agusan River padulong sa Brgy. Masao ning siyudad isip kabahin sa kalihukan subay sa kapistahan ning siyudad karong adlawa.
Sa eksklusibong pakighinabi sa Bombo Radyo Butuan, gibutyag sa event organizer nga si Patrick Ruiz gikan sa Balangay Sailing and Water Sports Association nga wala madayon sa gitakdang original venue ang maong kalihukan tungod sa pag-atras kagabii sa gi-hire nilang mga speed boats nga mao unta’y magbira sa 13 ka mga barutong de layag kon sail boats nga misalmot sa maong kalihukan.
Iyang gipasabot nga kung minos ang hangin nga maoy tuburan sa paglawig sa barutong de-layag, ang speed boat maoy mubira kanila ilabina nga masugat nila ang tubig gikan sa Agusan River.
Tungod niini, gi-divert nila ang ilang ruta gikan didto sa baybayon sa Brgy. Cubi-Cubi, lungsod sa Nasipit, Agusan del Norte ug wala na sila misulod sa Agusan River.
