BUTUAN CITY – Posibleng ibalik na ugmang adlawa, Huwebes, Enero 12, sa Department of Education kon DepEd-Butuan City Division, ang klase dinhi sa siyudad human ang suspensyon niini sukad pa kagahapng adlawa hangtud karon.
Bisan og pabiling suspendido ang klase alang sa elementarya ug sekondarya karong adlawa apan balik na ang trabaho alang sa mga teaching ug non-teaching personnel sa Department of Education kon DepEd-Butuan City Divison.
Sigon ni division superintendent Marilou Dedumo, kaganina pa lang alas-kwatro sa kaadlawon nila gideklara ang lugway sa class suspension aron dili masusama kagahapon nga na-ulahi sila ug duna na’y mga estudyanteng naka-adto na sa mga tunghaan.
Gumikan matud pa kay panahon karon sa ting-ulan, bisan og duna’y dyutay nga pag-init sa panahon, apan lauman gihapon ang pag-ulan rason nga padayon ang suspensyon sa klase.
Giklaro usab ni Dedumo nga magpadayon gihapon ang suspensyon hangtud duna pa’y mga evacuees sa mga hingtungdang lawak-tunghaan.
Giklaro usab sa opisyal nga samtang anaa pa sa mga lawak-tunghaan ang gipangbakwit, padayon gihapon ang paghatag og edukasyon sa kabataan gamit ang modular learning kansa daan na matud pang napahibalo ngadto sa mga hingtungdang magtutudlo.
Apan kung magpadayon ang maayong lakat sa panahon, mga alas-kwatro o kaha alas-singko pa langsa buntag ugmang adlawa, magpagawas na usab sila og notisya alang sa pagbalik na sa klase.
