BUTUAN CITY – Excited na ang Filipino community sa Estados Unidos ilabina sa Washington DC sa pagsanong ni Pangulong Ferdinand ‘Bongbong’ Marcos Jr., sa imbitasyon ni US President Joe Biden kaniya alang sa state visit.
Apil sa excited na usab nga makahimamat ang pangulo sa Pilipinas mao ang ubang mga world leaders tungod sa katuyuan nga makamugna og sound investment sa mga kanasurang gustong mububo og puhunan sa nasud.
Sa eksklusibong pakighinabi sa Bombo Radyo Butuan, gipadayag ni Bombo international correspondent sa Washington Atty. Arnedo Valera nga apil sa mga kalihukang salmutan ni Pangulong BBM mao ang 77th United Nations General Assembly nga sugdan sa Septembre 13 kondiin sundan kini sa summit sa Septembre 19 kansa i-convene sa UN Secretary General alang sa education transformation.
Pagka-Septembre 20 hangtud 26 mao na matud pa ang general debate diin mamulong si Pangulong Marcos.
Niining panahuna, duna matud pa’y mahitabong mga sidline meetings uban kang President Joe Biden aron hisgutan ang pipila ka mga isyu ug ubang ma lideres sa kalibutan.
Aminado si Atty. Valera nga dili malikayang sa usa ka demokratikanhong nasud sama sa Pilipinas ug Amerika nga anaa gayod ang mga pro ug anti-government rason nga dili angayang ikatingala kung sa pagbisita ni Pangulong Marcos sa Amerika, duna’y manggi-protesta.
Apan wala matud pa’y angayang kabalak-an tungod kay sa entiro Estados Unidos, nakuha sa BBM -Sara tandem ang mayoriya sa ilang mga boto.
