BUTUAN CITY – Anaa na sa luwas nga kahimtang ug nagpa-ayo pa sa hingpit sa Nasipit District Hospital ang usa ka 7-anyos nga batang lalaki human malampusong naluwas sa mga ginsakupan sa Agusan del Norte 1st Provincial Mobile Force Company dihang nalumos sa kadagatang sakop sa Barangay Vinapor, Carmen, Agusan del Norte kagahapong adlawa.
Nasayrang pasado alas 8:30 sa buntag, ang upat ka personahe sa maong unit sa pagpanguna ni task force commander PLtCol Romulo Dimaya Jr., nag-biking gikan sa gikan sa ilang kampo ngadto na sa Brgy Vinapor, Carmen, Agusan del Norte ug naligo sa Vinapor White Sand Beach Resort isip kabahin sa physical conditioning.
Pasado alas-11:25 sa buntag sa susamang beach resort, nakit-an ni PMSg Von Harjie Abucayan ang wala nay panimoot nga bata nga naglutaw na sa dagat, mga 8-metros ang gilay-on gikan sa baybayon.
Glayon kining gihaw-as sa pulis ug gibutang sa lamisa diin gihimo ang CPR nila PCpl Arnie Baron Jr ug Patrolman Richie Boy Peligro samtang si PLCol Dimaya maoy nagpahibalo sa maong hitabo dayng mandi sa driver sa patrol car nga magpahigayon og mobile patrol visibility dool sa lugar.
Ang batang lalaki, malampuson nga na-revive pasado alas 11:45 na sa buntag og naila kining si Cristopher Durano, nga residente sa Brgy Mahogany, Butuan City kondiin gidala gilayong siya sa Nasipit District Hospital alang sa dugang pang medical nga atensiyon.
