BUTUAN CITY – Hustisya ang singgit sa Sangguniang Kabataan kon SK Butuan City Federation human ang pagpusil-patay kang Nelbert Gacosta, ang SK chairman sa Brgy. Lumbocan pasado alas-9:45 kagabii kilid sa dalan sa Purok 7, Brgy. Masao.
Sa eksklusibong pakighinabi sa Bombo Radyo Butuan, gipadayag ni SK Butuan City Federation President Cynth Zephanee ‘Panpan’ Nietes, nga hangtud karon dili pa gihapon siya makatuo sa nahitabo sa iyang ka-uban sa trabaho ilabina nga usa kini sa mga aktibong SK chairmen ning siyudad.
Tungod sa ka-aktibo matud pa ni Gacosta sa mga kalihukan alang sa kabatan-unan sa ilang barangay, suportado siya sa mga batan-on dili lang sa ilang mga ka-baranggay kondili apil na sa ubang mga barangay ning siyudad nga nakasaksi sa iyang mga maayong nahimo.
Gawas sa ka-shock, aminado si Nietes nga naglagot usab siya tungod kay sunod-sunod na ang natigayong pagpamusil-patay nga mugintang lang og pila ka mga adlaw.
Karon pa niya nabati ang pagsinggit og hustisya sa mga biktima sa maong kremin tungod kay personal niyang ka-ila si Gacosta.
Hinuon kampante si Nietes sa kakapas sa kapulisan ning siyudad sa Butuan nga makab-ot ang hustisya alang sa pinaka-ulahing biktima sa pagpamusil. Kini ilabina nga ang unang mga susamang kaso ning bulana lang, wala pa’y natalang kasulbaran.
Nagtuo si Nietes nga tutukan kini nga hitabo sa Sangguniang Panlungsod uban sa kapulisan aron masulban ang ingon niini nga hitabo.
Gawas sa pakighia-alyon unya niya sa Committee on Police Matters and Public Safety sa pagpanguna ni Atty. Ehrnest John Sanchez, muduol usab siya kang Congressman Joeboy Aquino aron matutukan ug masulad kini nga problema.
