BUTUAN CITY – Padayon pa ang imbestigasyon sa Butuan City Police Station 1 sa lain na usba nga pagpamusil nga natigayon kaganinang alas-otso sa buntag sa Purok 3, Brgy. Ong Yiu ning siyudad.
Naila ang biktimang si Jerry John Apas, 43-anyos, minyo ug residente sa Purok 8 sa susamang barangay kinsang patay’ng lawas, gibutangan pa og karatola nga duna’y nakasulat nga mga pulong nga ‘Adik nga pusher, salot sa katilingban.
Dali kining gipanghimakak sa iyang asawang si Analy kinsa nagbutyag nga naka-ila siya sa iyang bana tungod kay kanunay silang mag-uban niini gawas lang sa panahon sa ilang pagtrabaho.
Gibutyag niining gihatod lang siya sa iyang bana sa barangay hall diin siya nagtrabaho ug naghulat na lang kini sa service shuttle sa Equi-Parco Construction Company aron usab mutrabaho dihang kini gipusil sa wala pa mailang responsable.
Igo na lang siyang gitawagan og gipahibalo sa nadangatan sa iyang bana kondiin na-ilo niini ang upat nila ka mga anak nga pulos pa mga minor-de-edad.
