BUTUAN CITY – Gipa-abot na ni Butuan City Fort Poyohon Brgy. Captain Archie Palad Golde ngadto sa Department of Environment and Natural Resources kon DENR-Caraga ang ilang problema kilid sa dalan sa may corner Montilla Boulevard nga gihimo nang labuganan og basura, tabok lang sa drainage canal.
Sa eksklusibong pakighinabi sa Bombo Radyo Butuan, gipadayag ni Kapitan Golde nga duna na sila’y gipasa sa DENR nga tax declaration sa nanag-iya sa pribadong luna aron matabangan sila pag-aksyon niini.
Nagtuo si Kapitan Golde nga mga lumalabay lang ang naglabog sa ilang mga sinakong basura sa nasangpit nga dapit.
Tungod kay dili na matud pa ma-ato sa ilang mga barangay tanod ang ilang trabaho, nagsuhol na sila og mga indibidwal nga mubantay niini ilabina panahon sa kagabhion ug sa kaadlawon aron lang masapon ang mga maglabay sa ilang mga basura.
