BUTUAN CITY – Hatagan og monetary reward sa lokal nga kagamhanan ning siyudad sa Butuan ang Butuanon taekwondo jin Dave Cea human misakmit og silver medal sa 74-kilogram men’s kyorugi nga nakadugang sa nakuhang medalya alang sa Team Philippines sa nagpadayong 31st Southeast Asian Games nga gipahigayon sa Tay Ho Gymnasium sa Vietnam.
Sa eksklusibong pakighinabi sa Bombo Radyo Butuan, gipadayag ni re-elected Butuan City Councilor Cromwell Nortega, chairman sa Committee on Youth and Sports sa Sangguniang Panlungsod, nga sa qualifying round pa lang ni Cea, mitunol na ang city government og gamay nga financial assistance aron magamit sa iyang mga panginahanglanon alang sa biennial meet.
Dugang pa ni Nortega, isip nagsunod na sa mga dula ni Cea human kini nahimong representante ning siyudad sa nagkada-iyang sporting events, gitu-uhan pa niyang maka-gold kini apan dako na gihapon nga dungog dili lang sa Butuan kondili sa tibuok nasud ang nakab-ot nga kada-ugan ni Cea.
Si Dave Cea, nga midula sa 74-kilogram men’s kyorugi, mitapos sa runner-up sunod sa naka-gold nga Cambodian nga si Mithona Va atol sa final sa score nga 13-34.
Napildi ni Cea sa semifinal si Indonesian Naufal Khairudin Osanando isa score 24-11, hinungdan nga nakasulod siya sa gold medal match kansa mao na ang iyang ikaduhang higayon sa biennial meet.
