BUTUAN CITY – Mulungtad pa hangtud sa adlaw’ng Martes sa buntag oras sa Pilipinas samtang Lunes sa gabii, oras sa Canada, ang ilang holiday tungod sa Semana Santa.
Kini ang pagsaysay ni Bombo international correspondent Rodge Cultura direkta gikan sa Ontario, Canada.
Sa eksklusibong pakighinabi sa Bombo Radyo Butuan, gipadayag sa Butuanon broadcaster kinsa atua na nagtrabaho ug nagpuyo sa maong nasud, nga nagsugod ang ilang holiday kon bakasyon niadtong Biernes Santo ug tungod kay taas-taas ang adlaw sa bakasyon, daghan ang magbakasyon sa laing estado ilabina ang mga batan-on aron magsuroy-suroy sa ilang kahigalaan.
Dugang ni Cultura, naka-obserba pa siya og usa ka Semana Santa ilabina sa Easter celebration niadtong tuig 2019 dihang wala pa ang COVID-19 pandemic ug dinhi niya na-obserbahan ang kalahian niadto kumpara ning nakalabay’ng upat ka mga tuig.
Bisan og dili na puno-puno ang mga simbahan ilabina sa Ontario kumpara sa mi-aging mga tuig tungod sa nagpadayong hulga nga hatud sa COVID-19 kansa anaa na sa 6th wave, apan wala kini nahimong babag sa pagdalikyat gihapon ilabina sa mga kababayang Pinoy sa pag-uban sa ilang mga relihiyusong kalihukan diha sa mga simbahan.
Samtang kaganinang alas-4:30 sa hapon oras sa Pilipinas ug alas-4:30 sa sayong buntag, oras sa Toronto, gihimo ang sugat sa parking lot sa Our Lady of Assumption Parish.
Karon matud pang adlaw sa Pagkabanhaw magtapok ang Filipino-Canadian community alang sa na-andan nang Easter Egg Hunt kansa ginahimo usab sa mga magbarkada ug sa matag-pamilya.
