BUTUAN CITY – Gihandom sa dakbayan sa Butuan kaganinang buntag ang ika-80 nga anibersaryo sa Araw ng Kagitingan karong adlawa kansa mas nailang ‘The Fall of Bataan’ ang adlaw sa pagmartsa sa mga sundalong Pinoy ug nga Amerikano human nahugno ang Bataan sa kamot sa mga Hapon hinungdan sa natigayong death march.
Sa eksklusibong pakighinabi sa Bombo Radyo Butuan, gipadayag ni Luigi Lusaria, head sa Philippine Veterans Affairs Office kon PVAO-Caraga, nga kini isip paghandom sa ilang nahimo sa nasud kansa pagpakita sa ilang pagkabayani batuk sa mga sumasakop nga mga Hapon hinungdan sa padayong pakigbisog sa mga Filipino hangtud nga hingpit nang na-angkon sa nasud ang kagawasan.
Ang nakasubo lang tungod kay nahurot na og kamatay ang tanang mga beterano sa ikaduhang gubat sa kalibutan human na-igo sa COVID-19 pandemic samtang ang uban, tungod na usab sa katigulangon.
Alayon niini, nagtunol og pasidungog ang PVAO ngadto sa pamilya sa duha ka mga Caraganons nga namatay sa nahagsang C-130 plane ning mi-aging tuig, usa alang sa usa ka post-World War 2 veteran ug sa usa ka medal of valor awardee sa panahon ni kanhi Pangulong Fidel Valdez Ramos.
Ang maong medal of valor mao ang pinakataas nga award sa Armed Forces of the Philippines kon AFP nga natunol ngadto kang Roy Cuenca ng taga-Libertad ning siyudad niadtong tuig 1992.
Karong wala na’y nabilin nga mga beterano sa ikaduhang gubat sa kalibutan, giklaro ni Lusaria nga duna pa gihapo’y madawat nga burial benefit ang na-ilo nilang mga asawa.
Kini wala pa’y labot sa binulan nilang pensyon nga ihatag ngadto kanila sa tibuok nilang kinabuhi nga mukantidad og 5-mil pesos ug cover usab sa PVAO ang galastuhan sa ilang pagpa-ospital.
